Иворъёс


Туала удмурт прозалы но кылбуретлы сӥзем антлогиосын тодматскон

18.02.2020



17-тӥ тулыспалэ Калыкъёслэн Эшъяськон юртазы туала удмурт прозалы но кылбуретлы  сӥзем антологиосын тодматскон ужрад  ортчиз.

Антологиос поттэмын «Удмуртия» книгапоттониен Удмуртилэн кунлыкезлы 100 ар тырмонэз пусъён улсын Удмурт Элькун Кивалтэтлэн юрттэменыз. Прозаен бичетэ пыртэмын 32 писательёслэн произведениоссы, поэзиен бичетэ – 42 кылбурчиослэн кылбуръёссы.

Люкаськем калыклы, куноослы ӟечкыланэн вазиськиз йӧскалык политикая министр Л.Н. Буранова. Лариса Николаевна антологилэсь редакторзэ С.В. Матвеевез но дизайнерзэ А.С. Закревскаяез министерстволэн таукаронэныз данъяз.

Бичетъёс бордын ужамзы сярысь мадиз удмурт кылбурчи, Россиысь писательёслэн огазеяськонзылэн ёзчиез, антологиослэн редакторзы Сергей Матвеев.  Сергей Васильевичлэн пусъемезъя,  удмурт литературалэн но книгапоттонилэн историяз таӵеез антологи ӧй вал на.

Та ӝытэ бичетэ пырем кылбуръёсъя гожтэм кырӟанъёс, произведениосысь люкетъёс чузъяськизы, авторъёс вераськиз. Лыктэм куноос озьы ик тодматскизы «Туала удмурт литература» выставкаен, кудзэ радъяз Удмурт Элькунысь йӧскалык лыдӟетъюрт.