Иворъёс


Удмурт кылэз дышетонъя гимнази классъёс усьтон ужпумез эскеризы Глазкарын

06.02.2020



 Глазкарын удмурт кылэз дышетонъя гимнази классъёс, нош азьланяз - Флор Васильев нимо йӧскалык гимназия усьтон сярысь вераськизы. 

Глазкарлэн тӧроез Сергей Коновалов дорын кенешонэ Удмуртиысь йӧскалык политикая министр Лариса Буранова, Кун Кенешысь тодосъя, дышетонъя, лулчебертъя, йӧскалык но егитъёсын ужан политикая но спортъя ялан ужась ӧрилэн кивалтӥсез, «Удмурт Кенеш» Татьяна Ишматова, Удмуртиысь дышетонъя но тодосъя министрлэн воштӥсез Ирина Крохина, Кар думалэн тӧроез Игорь Волков но карысь дышетсконниослэн но мер огазеяськонъёслэн ыстэм муртъёссы пыриськизы. Кенешонэ пыриськисьёс нимысьтыз пусйизы, йӧскалык сӧзнэтэз котыр ласянь азинтоно шуыса.

Йӧскалык программалэн валтӥсь юрттӥсез Глазкарысь пединститут луоз. Ӵапак отын удмурт кылъя дышетӥсьёсты, нылпи садъёсын йӧскалык группаосын визьнодасьёсты дасяны быгато. "Милям со понна ваньмыз вань: ужзэс гажась, яратӥсь ӧнерчиосмы но, аспӧртэм ужан амалъёсмы но, туала тӥрлыкен но дышетон пособиосын инъетмы но", - пусъе Янина Чиговская-Назарова, Глазкарысь дышетӥсьёсты дасянъя кун институтлэн кивалтӥсез. 

Чакланъёсъя, удмурт гимнази классъёс карысь 16 но 17 номеро школаосын ужаны кутскозы. Глазкарлэн тӧроез Сергей Коновалов йӧскалык классъёсты усьтонъя ужась группа кылдыны косӥз. 

Удмурт кылэз дышетыны мылкыдэз ӝутыны быгатоз уйпал ёросъёсын этнотуризмъя кластерез кылдытон но.

Пумиськон бере Лариса Буранова «Фейсбукысь» бамаз пусйиз: "Удмуртилэн кунлыкезлы 100 ар тырмонлы дасяськон радлыклэн одӥгез люкетэз - удмурт кылэз дышетонъя школаослэсь сӧзнэтсэс азинтон уж. Глазкарын но Можгаын йӧскалык гимназиос усьтон ужпум сярысь вераськон кемалась мынэ. Шумпотӥсько но тау карисько Сергей Коноваловлы, соя ужаны кутским шуыса".

Ивор кутэмын "Удмуртия" ИА-лэн бамысьтыз.