Иворъёс


"Пельняньлэн дунневыл нуналэз" кутскоз "Юмшанэн"

29.01.2020



31-тӥ толшоре Удмуртиын «Пельняньлэн дунневыл нуналэз» фестиваль улсын радъяськись ужрадъёслы кутскон сётозы. Нырысетӥез соос пӧлысь вашкала удмурт калык шудонъёсын выль сямен шудонъя «Юмшан» ӵектос луоз.

Туэ нырысьсэ «Юмшан» ӵектос Ижкарлэсь палэнэ потоз элькунысьтымы ньыль интыын ортчоз: Удмуртилэн шоркараз сяна, Дэри ёросысь Ягул, Октябрьский но Италмас черкогуртъёсын

Мӧйыос но пиналъёс азбаръёсазы шулдыръяськонэ люкаськозы но вашкала удмурт шудонъёсын тодматскозы. Калыкез пельнянь тусо ӝужыт мунёос но удмурт мифологиысь геройёс шулдыртозы.

Азбаръёсты шулдыръяськонлы нимысьтыз дасялозы но куноослы пӧртэм шутэтскон амалъёс ӵектозы: гынсапеген хоккей, лымы мунёос лэсьтон. Со сяна, пельнянен но пӧсь чаен куноятозы. Озьы ик спорт шудонъёс, нылпиослы анимация, туспуктэм лэсьтон интыос радъялозы. Ужрадэ пыриськисьёсты удмурт эктонлэн люкетъёсыныз, удмурт гуръёсын но удмурт калык шудонъёсын тодматозы, соос пӧлын «Капкаен шудон», «Небыльток», «Кышетэн шудон», «Тябыкен шудон» но «Кутэн шудон».

Ужрад улсын «Великая книга» квестэ, «Батыр кужым» вожвылъяськонэ гожтӥськыны луоз. Соос 8-тӥ тулыспалэ Ижкарысь Шор площадьын ортчозы

Пусъём, «Пельняньлэн дунневыл нуналэз» 2015-тӥ арысен арлы быдэ ортчытъяське но улосвылмес умой ласянь возьматон но тодмамон карон, удмурт йӧскалык лулчеберетэз возьматон понна радъяське.

Тодэ вайытом, туэ фестиваль «Ческыт выжыкыл» ним улсын ортчоз. Тулыспалэ фестиваль улсын Удмуртиын пӧртэм ёросъёсын улӥсь калыкъёсын но соослэн йылолъёсынызы тодматозы.

 Ивор кутэмын Удмуртия ИА-лэн бамысьтыз