Иворъёс


Выль ӟуч-удмурт кыллюкамен тодматон

28.01.2020



27-тӥ толшоре Ижкарысь Калыкъёслэн эшъяськон юртазы Удмуртилэн кунлыкезлы 100 ар тырмонлы поттэм выль кык томъем ӟуч-удмурт кыллюкамен тодматон ортчиз. Отчы тодосчиос, гожъяськисьёс, дышетӥсьёс, книга поттӥсьёс, журналистъёс, мер ужасьёс люкаськизы.

Выль кыллюкамез поттон бордын Историяя, кылъя но литературая удмурт институтысь тямыс ӧнерчиос ужазы. Люкаськемъёс ваньзы ик та бадӟым ужез кема возьмам шуыса пусйизы. Уго талэсь азьвыл берпуметӥез ӟуч-удмурт кыллюкам 63 ар талэсь азьло 1956-тӥ арын потӥз вал, отчы 40 сюрс пала кылъёс пыризы. Нош выль кыллюкам 55 сюрслэсь трос кылъёсты удмуртэ берыктэ. Со сяна, куд-огъёсызлы валэктон но сётэ.

Удмуртиысь йӧскалык политикая министр Лариса Бурановалэн верамезъя, та уж вылэ пыкъяськыса, удмурт кылэз туала интернет вӧлметэ пыӵатон ужпум сылэ.  Удмурт кыл – туала, со туннэ но али, со улэп, со музейысь шер пумиськылӥсь маке, архивысь ӧвӧл. Соин со адямилэн вань улон ӧръёсаз кутӥськыны кулэ.

Кыллюкам бордын ужась тодосчиос озьы ик удмурт кыллэсь йӧскалык корпуссэ кылдытон бордын тыршизы. Отчы выль ӟуч-удмурт кыллюкам но 2008-тӥ арын потэм удмурт-ӟуч кыллюкам, озьы ик удмурт кылын гожтэм статьяос пыризы.

Россиысь тодосъя академилэн Урал ёзэтысьтыз Эскеронъёсъя удмурт федерал центрлэн кивалтӥсезлэн Михаил Альеслэн ивортэмезъя,  «Яндекс» компаниен кылысь кылэ электрон берыктӥсь кылдытон пумысен тупанкыл гожтэмын ини. Отын нейросетьёс, искусственной интеллект технологиос вылэ пыкъяськыса, выль кыллюкамысь даннойёс кутӥськозы.

Пусъём, кыллюкам Удмуртиысь йӧскалык политикая министерстволэн юрттэменыз «Удмуртия» книгапоттонниын кык сюрс тиражен потӥз. Кызьы вераз издательстволэн кивалтӥсез Юрий Кузнецов, матысь дыре огазеяськонъёс но ужъюртъёс кыллюкамъёсты дунтэк басьтыны быгатозы. Озьы ик со вань мылкыд карисьёслы но вузаськоз.

Ивор кутэмы ИА Удмуртиялэн бамысьтыз.