Иворъёс


Нырысетӥ удмурт интернет-телевидение кылдытонлы кичӧлтон сётэмын

23.12.2019



Таӵе малпан азьлогес кылдӥз вал ини, али нош со улонэ пыӵаны кутскоз – вера «Даур ТВ» ӵектослэн кылдытӥсез Богдан Анфиногенов.
Удмурт интернет-телевидение сярысь пыр-почгес тодон вылысь вераським Богдан Анфиногеновен:
«-Мар со сыӵе интернет-телевидение?
-Интернет-телевидение со нырысь ик меӵак эфирын ужась канал, кудӥз ужа вотэсын, онлайн. Огшоры вераса, со уй-нунал чузъяськись «стриминг».
— Кыӵе платформаын со ужалоз?
-Та вакытэ малпаськом кык платформаосын сое возьматыны: Яндекс.Эфир но ВКонтакте.
— Мар отын возьматӥськоз? Кыӵе передачаос но оглом контент?
— Отын возьматыны малпаськомы пӧртэм видеоконтент (клипъёс, фильмъёс, мультфильмъёс, интервьюос, передачаос но мукет), ваньмыз со луоз удмурт кылын. Озьы ик одно ик луозы асьмелэн но рубрикаосмы, передачаосмы, live вставкаос.
— Кин со бордын ужалоз, кин сое лэсьтоз?
— Та дыре ми вераським ни Владислав Горжакен, Петр Пушкинэн ӵош со бордын ужаны («Эктоника»), озьы ик «Куара» организацилэн кӥвалтӥсеныз Владислав Степановен но кенешиськом та сярысь (угось, ӵапак соос али туала но ӟеч видеоконтент кылдытъяло). Зэмзэ вераса, котькин быгатэ та уже пыриськыны, кинлэн мылкыдыз (малпанъёсыз, тодонъёсыз, быгатонлыкъёсыз) вань, ӧтиськом вань мылкыд карисьёсты!»
Удмурт интернет — телеканалэз учкыны луоз смартфон пыр но. Выль ужлэн валтись аспортэмлыкез – интерактив — телевидениез учкисьёс меӵак герӟаськыны быгатозы сое лэсьтӥсьёсын.

Ӵектос ужаны кутскоз тулыс. Со дырозь вань кулэ луись техника басьяны, передачаосты но программаосты радъяны чакламын.

туспуктэм - udmurt.ru