Иворъёс


Финно-угроведъёс люкаськизы Ижкаре огъяросси конференцие

05.06.2019



 4-7 инвожое Ижкарын Финно-угроведъёслэн VI огъяросси конференцизы ортче. Удмуртилэн шоркараз Россилэн 20 улосвылъёсысьтыз но 9 кунъёсысь 300-лэсь трос ӧнерчиос люкаськизы. Конференцилэн темаез: «Финно-угорский мир в полиэтничном пространстве России: культурное наследие и новые вызовы».

 5-тӥ инвожое Удмуртиысь Калыкъёслэн эшъяськон юртазы ужрадэз сӥё-дано усьтон но пленарной кенешон ортчиз.

Финн-угор тодосчиос бадӟым конференцие 6-тӥзэ люкасько. 5 арлы одӥг пол радъяськись ужрад огазея кылэз эскерон, фольклор, энтографи, истори но мукет удысъёсъя ӧнерчиосты. Ученоёсын ӵош, тодон-валан басьтыны но эскерон ужъёсынызы тодматыны студентъёс но аспиртанъёс пырисько.

Конференциын ӝутэм одӥгез ужпум кыллэсь йӧскалык корпуссэ кылдытонэн герӟаськемын. Со, шуыны луоз, ивортодэтъя цифровой бичет, кудӥз кылэз дышетон, солэсь воштӥськемзэ чаклан понна инъет луэ. Со корпусэ вань кыллюкамъёс, чеберлыко литература, иворъёс пыро.

Удмурт кыллэсь корпуссэ кылдытон бордын Россиысь тодосъя академилэн Урал ёзэтысьтыз Эскеронъёсъя удмурт федерал центрысь ӧнерчиос али тыршо. Солы инъет кыллюкамъёс луозы.

Та но мукет ужпумъесты тодочиос секциосын, симпозиумъесын но котрес ӝӧк сьӧрын кенешонъесын эскерозы. Конференци финно-угорведъёслэн дунневыл конгрессылы дасяськон луэ. Тодосчиос огинэ вуоно арын Венаын люкаськозы.