Иворъёс


Кун кылъёсъя элькун катэ воштонъёсты пыртон сярысь вераськизы Ижкарын

03.06.2019



 Удмуртилэн Кун Кенешысьтыз тодосъя, дышетонъя, лулчеберетъя, йӧскалык но егитъёсын ужан политикая но спортъя ялан ужась ӧрилэн тӧроез Татьяна Ишматова кивалтэм улсын «Удмурт Элькунысь кун кылъёс но Удмурт Элькунысь мукет калыкъёслэн кылъёссы сярысь» катэ воштонъёс пыртыны ӵектонъёсъя ужась группалэн кенешонэз ортчиз.ӥ

Татьяна Ишматова катлэсь Удмуртиын вань улӥсьёс понна кулэлыксэ пусйиз, котькуд тупатон рос-прос эскеремын но валэктымон луыны кулэ шуиз. Озьы ик солэн верамезъя, кун кылъёс сярысь катэ воштонъёс пыртыку кылъёсты дышетыны умой инъет кылдытонлы сяна, йӧслыкъёс куспын тупаса улонэз утёнлы но азинтонлы нимысьтыз саклык висъяно.

Катралдыке таӵе воштӥськонъёс пыртыны ӵектэмын: катлэсь азькылзэ (преамбулазэ) паськытатыны но отчы нылпиосты анай кылзылы дышетон анай-атайёслэн граждан долгзы луэ шуыса кылъёсын ватсаны. Со сяна, катын «возможностей» кылэз воштыса, ужкагазэ ӟуч но удмурт кылъёсты дышетыны огкадь условиос кылдытэмын луыны кулэ шуыса гожтыны ӵекто.

Кенешонэ люкаськемъёс Удмуртиысь кылъёсты утёнъя, дышетонъя но азинтонъя ужрадъёс ортчытонъя кун программаослэн аспӧртэмлыкъёссылы нимысьтыз саклык висъязы.

Катрадлык бордын ужез мукет йӧскалык улосвылъёслэсь кун кылъёсты утёнэз но азинтонэз катъёсын радъян амалъёссэс эскерыса азьланьтозы.

Катэ пыртыны ӵектэм воштонъёсты парламентлэн сессияз туэ шуркынмонэ-толсуре поттозы.

https://udmurt.media/udm/news/politika/57397/