Иворъёс


Ашальчи Оки нимо йӧскалык премилэсь лауреатъёссэ пусйизы «Удмурт кенеш» огазеяськонлэн Пичи кенешаз 19 апреля 2019 г.

20.04.2019



 «Удмурт кенеш» огазеяськонлэн Пичи кенешаз 2019-тӥ арын Ашальчи Оки нимо премилэсь лауреатъёссэ пусйизы. Туэ данъетэз удмурт калыклэсь лулчеберетсэ утён но азинтон удысъёсын бадӟым уж нуэмез но чеберлыко но мур пуштросо произведениос кылдытэмез понна удмурт кылбурчилы, журналистлы, Удмурт элькунысь лулчеберет удысысь сӥё-дано ужасьлы Татьяна Черновалы но дышетон удысын тыршемез, удмурт калыклэсь лулчеберетсэ утён но азинтон удысъёсын бадӟым уж нуэмез понна Балезино ёросысь Исак школаысь удмурт кылъя но литературая дышетӥсьлы, Россиысь дышетон удысысь дано ужасьлы Татьяна Захаровалы сётӥзы.

«Удмурт калык понна мед тыршозы. Ми 90-тӥ аръёсы тыршим, со секыт аръёсы. Али но озьы ик мед вань сюлмысьтызы тыршозы, асьмелэн удмуртлык но удмурт кыл медам быре шуыса. Удмурт кылы – аныкае! Тон улонэ, лул шоканэ. Тонтэк уг пӧрмы уж-пӧры, Тонтэк лултэм мон, из пыры. Озьы тӥни шуысал», — шуиз Татьяна Чернова.

«Бадӟым дан таӵе нимез нуллыны, таӵе йӧно кылбурчиосын артэ сылыны. Дышетон удысын Лина Григорьевна трос ӧз тыршы, но пиналъёслэсь синъёссэс усьтӥз, но усьтӥз тужгес но врач луыса. Мон соин уг ӵошатскы, со туж дано, йӧно адями удмурт калыклэн. Мон 30 ар ӵоже ужатозям Ашальчи Окилэсь улонзэ-вылонзэ, кылбуръёссэ пыӵатыны тырши пиналъёсылы, котькуд тубатын вылӥегес тубыны юрттӥ-а мар-а шуод», — вераз Татьяна Захарова.

https://udmurt.media/udm/news/kultura-i-turizm/54740/