Иворъёс


Киров улосын удмурт лулчеберетлы сӥзем нуналъёс йылпумъяськизы

01.03.2019



26-тӥ – 27-тӥ тулыспалэ Удмуртиысь но Киров улосысь удмурт движение пыриськисьёс йӧскалык лулчеберетэз утёнъя но азинтонъя форуме пыриськизы.

 

Форумлэн нырысетӥ нуналыз Кировысь Калыкъёслэн Эшъяськон юртазы ортчиз. Отын котырес ӝӧк сьӧрын «Сохранение и развитие удмуртской культуры и языка на территории Кировской области» темалы вераськонъёс мынӥзы. Отчы пыриськизы Киров улосысь удмурт компонетъя ужась дышетон учреждениосысь дышетӥсьёс но школьникъёс, озьы ик творческой коллективъёс.

Собере секциосъя уж мынӥз. Кыккылолыко дышетон амалъёс сярысь вераз Ижкарысь йӧскалык гимназиысь дышетӥсь Татьяна Кудрявцева. Егитъёслэсь проектъёссэс улонэ пыӵатон амалъёсысын люкиськиз «Шунды» огазеяськонлэн тӧроез Алина Чернова. Йӧскаылк лулчеберетэз утёнъя клубъёслэн ужамзы сярысь мадиз калык творчествоя юртысь методист Вероника Фёдорова.

Форумлэн кыкетӥ нуналыз Киров улосысь Слободской ёросын ортчиз. Светозарево гуртын удмуртъёс уло. Соосын пумиськон радъямын вал. Удмуртиысь вуэм куноос пӧртэм темаосъя мастер-классъёс ортчытӥзы. «Марӟан» ансамбльысь артистъёс эктонъёс дышетӥзы. Пиналъёс вашкала но туала удмурт шудонъёсын тодматскизы, анай кылын мультфильм учкизы, туала крезьгурез кылзӥзы.

«Гурт клубын йӧскалык висъетсы вань, нош школаын — музейзы, — паймемзэ вера Алина Чернова. – Отын юртъер котырын кутӥськись арбериос, дӥськутлэн люкетъёсыз утисько. Йӧскалык комнатаын интерактивной экскурсиос ортчытъяло – нылпиос дӥськут мертаны, сиён пӧраны, утись мунёос лэсьтыны быгато».

Удмурт лулчеберетлы сӥзем нуналъёс Святозаревоысь лулчеберетъя юртын йылпумъяськизы. Сцена вылын быгатонлыкъёссэс  татысь “Тыпыртон” но “Лыз кутюк” ансамбльёс возьматӥзы, озьы ик Татарстанысь удмурт ансамбль но Удмуртиысь «Марӟан» коллектив.