Иворъёс


Йӧскалык кусыпъёслы сӥзем нырысетӥез форум ортчиз Можга педколледжын

05.03.2019



26-тӥ тулыспалэ Можгаысь педколледжын "Удмуртия - трос калык выжыё элькун" ним улсын форум ортчиз. Сое радъяз Можга колледжысь этнокультурая центр.  Форуме 100 пала егитъёс пыриськизы. Центр 3 ар талэсь азьло пӧртэм выжыосысь егитъёсты огазеян, мукет культураен тодматон вылысь кылдытэмын вал. Вераны кулэ, педколледжысь этнокультурая центрлэн таӵе бадӟым ужрадэз нырысетӥез. Йӧскалык кусыпъёсты азинтон, улонын ас интыдэ шедьтон, керӟегъяськонъёстэк улыны дышетскон – та но мукет ужпумъёс пуктэмын вал егитъёслы чаклам дышетсконын. «Милям колледжамы 6 выжыысь егитъёс дышетско. Соос пӧлын нокыӵе валамтэяськонъёс уг луо, — шуэ Можга педколледжлэн кивалтӥсез Григорий Владимиров. — Берло дыре ачим но чакласько, удмурт кылын вераськисьёс но тросгес луизы. Монэн но удмурт сямен ӟечбуръясько – туж шумпотӥсько. Форуме люкамы студентъёсты, школьникъёсты.  Соос мед валалозы — азьланяз асьме шаермес кужмоятон понна, калыкъёслэсь культураоссэс огазеян вылысь тыршоно луоз шуыса». Форумын уж 4 ӧръёсъя мынӥз: «Информационная безопасность», «Социальное проектирование», «Толерантность», «Межкультурный диалог».

«Вуоно форумез паськытгес ортчытомы — вань мылкыд карисьёсты, мукет улосвылъёсысь судентъёсты  ӧтёмы, — шуэ этнокультурая центрысь методист Эльвира Шумилова. – Таяз форумамы но туж трос куриськисьёс вал. Школаос, дышетӥсьёс вазиськылӥзы. Но ужрадмы 100 адямилы гинэ чакламын вал».