Иворъёс


Удмурт Элькунысь йӧскалык политикая министерстволэн Коллегиз ортчиз

14.12.2018



13-тӥ толсуре Удмурт Элькунысь йӧскалык политикая министерстволэн Коллегияз йӧскалык политикаын  интывылъёсысь аскивалтэтлэн интыез сярысь вераськизы. Йӧскалык кусыпъёсты радъян уж ӵемысь интывылъёсысь аскивалтэт вылэ усе.

Кенешонын пусйизы – выжы калыкъёс куспын валамтэ учыръёс интыосын соосты сэрттыны-пертчыны турттымтэен, соослы кулэезъя саклык висъямтэен кылдо.

«Милям муниципал кылдытэтамы тросгес поръёс уло, — шуэ Каракулино ёросысь «Быргында» поселенилэн тӧроез Вернер Ушаков. – Озьы ке но выжы калыкъёслэн лулчеберетсылы сӥзем ужрадъёсты ваньмыныз ӵош ортчытъяськом. Соин кусыпъёс ласянь нокыӵе шугъяськонъёсмы ӧвӧл. Туннэ коллегия возьматӥз, ужмы пайдаёгес луоз проектъёсъя ӧрез азинтим ке».

«Нош милям ёросамы удмуртъёс, ӟучъёс, бигеръёс уло. Валаса, огкылысь улӥськом, — вера Сюмси ёросысь «Удмурт Кенеш» огазеяськонлэн ёзэтэныз кивалтӥсь Наталья Стрелкова. – Эшлыко кусыпъёс кылдытыны юртто валче ужрадъёс, но со ӧжыт. Проектъёс пыр вуж темаосты выль сямен возьматыны кулэ».

Коллегилэн йылпумъянъёсызъя, интыосысь кивалтӥсьёслы йӧскалык кусыпъёсъя программаосты выльысь эскерыны но кураторъёсты юнматыны ӵектэмын.