Иворъёс


Егитъёслэн «Вместе» центрзылэн дышетонъя улосвылкуспо сессизы усьтӥськиз Ижкарын

25.10.2018



25-тӥ коньывуонэ, Ижкарысь Калыкъёслэн эшъяськон юртазы Егитъёслэн дышетонъя трос йӧслыко «Вместе» центрзылэн витетӥез улосвылкуспо сессизы ужаны кутскиз. Удмуртилэн шоркараз Пермь шаерысь, Воронеж, Нижний Новгород, Челябинск, Киров, Омск, Иркутск улосвылъёсысь, Комиысь, Марий Элысь, Мордовиысь куноос вуизы, озьы ик асьме элькунысь ёросъёсысь но каръёсысь егитъёс люкаськизы.

Ӵектослэн валтӥсь ужпумез – егитъёслэсь пӧртэм выжы калыкъёслэсь кусыпъёссэс радъян но тупатон ласянь кичӧлтонъёссэс кылдытонъя но улонэ пыӵатонъя кенешон-дышетскон площадка кылдытон. Сессие пыриськисьёс егитъёс пӧлын мукет калыкъёсты адӟонтэм карон мылкыдъёсты алон амалъёс, ӵектосъёсын кивалтон, азинтон амалъёс сярысь тодозы. Озьы ик мастер-классъёсы, кенешонъёсы, практика занятиосы пыриськозы.

Удмуртиысь йӧскалык политикая министр Лариса Буранова «Вместе» центрлэн ӵектосъёсыз сярысь вераз. Соос пӧлын 2-тӥ шуркынмонэ ортчоно «Бадӟым этнографи диктант», отчы пыриськисьёс Россыиысь калыкъёслэн лулчеберетсы но йылолъёссы сярысь юанъёслы валэктонъёс сётозы. Озьы ик со дышетон сессилэсь кулэлыксэ пусйиз.

«Россиын одӥгез бадӟым со ужпум пӧртэм удысъёсын тодӥсь-валась адямиослэн тырмымтэенызы герӟаськемын. Йӧскалык политикаын со – тужгес кышкыт, угось калыкъёслэсь кусыпъёссэ сӧрыны, керетонъёсы вуттыны быгатэ. «Вместе» центрлэн дышетон сессиосыз йӧскалык политика удысъя профессионалъёсты дышетон понна умой инты луэ, татын егит ӧнерчиос кулэ опыт но тодонлык басьто», — шуиз Лариса Буранова, Удмуртиысь йӧскалык политикая министр.

Дышетон сессие эксперт сямен ӧтемын Росси азьмурт бордын ужась Йӧслык кусыпъёсъя кенешлэн комитетэзлэн кылкутӥсь секретарез, Россиысь калыкъёслэн ассамблеязылэн кенешезлэн тӧроезлэн воштӥсез Андрей Худолеев. Со но таӵе ужрадъёс йӧскалык политикаез азинтон понна туж кулэ шуыса пусйиз.

«Россия трос йӧслыко кун луэ – ваньзылэсь тунсыкъёссэс лыдэ басьтыны, вераськыны быгатыны кулэ. Озьыен, милем этнография удысъя тодон-валанъёсын, йӧскалык политика удысысь ужрадъёсты шонер но гажаса возьматыны быгатӥсь адямиос кулэ», — вераз Андрей Худолеев, Россиысь калыкъёслэн ассамблеязылэн кенешезлэн тӧроезлэн воштӥсез.

Сессие пыриськисьёслы пайдалыко ужаны озьы ик сӥзиз Удмуртиысь Калыкъёслэн эшъяськон юртсылэн кивалтӥсез Татьяна Боталова.

25-26 коньывуонэ мастерскойёс, лекциос, экспертъёсын кенешонъёс, ӵектосъёс бордын ужан радъяськозы.

https://udmurt.media/udm/news/obshchestvo/43993/