Иворъёс


Ижкарын «ТодМА!» визьбур шудон ортчиз

18.10.2018



Ӵыжы-выжы финн-угор калыкъёслэн нуналъёссылы сӥзем «ТодМА!» визьбур шудонэ 17-тӥ коньывуонэ 12 команда пыриськиз, котькудаз быдэн куать адямиен. 

Визез сынан «60 секунд» шудон выллем радъяськиз. Валтӥсь аспӧртэмлыкез – тросэз юанъёс финн-угор калыкъёсын герӟаськемын вал. Соосты Удмуртиысь Калыкъёслэн эшъяськон юртысьтызы калыккуспо но финн-угор кусыпъёсъя ёзэтысь ӧнерчиос дасязы. Юанъёсты вить блоклы люкизы, соос пӧлын матрица, суредъёс, кылбуретъя но крезьгуръя юанъёс.

Тужгес трос шонер валэктонъёс сётӥз пор егитъёслэн «Ужара» огазеяськонзылэн командаез. Блокъёс вискын соос ик сцена вылысен йӧскалык эктонзэс возьматӥзы.

Кыкетӥ инты басьтӥз «Палинкаос» команда, отчы удмуртъёс но мадьяръёс пыриськизы. Куинетӥ луиз «Валамон-Паримон», та команда «Шудком» удмурт визьбур клублэн кык полэз чемпионэз луэ.

https://udmurt.media/udm/news/avto/43587/