Иворъёс


Удмуртиысь Калыкъёслэн эшъяськон юртсылы - 10 ар

05.09.2018



5-тӥ куарусёнэ Калыкъёслэн Эшъяськон юртсы 10 ар тырмонэз пусйизы. Сӥё-дано ужрадэ мерлыко огазеяськонъёслэн кивалтӥсьёссы но ёзчиоссы, ёросъёсысь но бускель улосъёсысь ӧтем куноос, ужъюртлэн ӵош ужам эшъёсыз пыриськизы. 

Россия Федерацилэн Президентэзлэн Администрациысьтыз Йӧскалык политикая депатраментэзлэн кивалтӥсез Татьяна Вагина Калыкъёслэн Эшъяськон юртазы ужасьёслы сӥзёнъёссэ видеоӟечкылан пыр вераз.

Удмурт Элькунлэн Тӧроезлэн нимыныз люкаськемъёсты ӟечкылаз элькун Тӧролэн но Кивалтэтлэн администрацизылэн кивалтӥсез Сергей Смирнов. «Калыкъёслэн Эшъяськон юртсы – туж шонер ним быръемын та ужъюртлы. Та юртын, дорын кадь, дасям кылъёсты верам уг поты, потэ мылкыдъёсты верам. Тау кареме потэ йӧскалык кусыпъёсты юнматон удысын ужасьёслы. Удмуртия – элькун, кытын ог-огенызы тупаса 100-лэсь уно калыкъёс уло. 10 ар талэсь азьло Удмуртилэн нырысетӥ Президентэз А.А. Волков та Юртэз усьтон сярысь гинэ пумкылъян ӧз куты, со трос лэсьтӥз элькунысьтымы калык кусыпъёсты радъян понна. Одӥг липет улэ огазеяз вань  мерлыко огазеяськонъёсты».

Калыкъёслэн Эшъяськон юртсы  – кун тӧрлык ёзэслэн но мерлыклэн ӵошен ужамзылы усто пример луэ. Татын котькуд калыклэсь лулчеберетсэ азинтыны, элькунамы тупаса улонэз утьыны луонлыкъёс кылыдтэмын. Татын выль ӵектонъёс вордӥсько, кудъёсыз бӧрысь быдэс Россие вӧлмо. Кылсярысь, «Этнографияя бадӟым диктант», егитъёслы йӧскалыккуспо «Вместе» дышетон центр, муниципал кылдытэтъёслэн «Мир в диалоге» форумзы, «Пельняньлэн дунневыл нуналэз»  фестиваль.