Иворъёс


3-тӥ куарусён — Терроризмен нюръяськонын огкылысь луон нунал

04.09.2018



Ижкарын Терроризмен нюръяськонын огкылысь луон нуналлы сӥзем «Улон шапык» огъяросси акци ортчиз. Ужрад 14 ар талэсь азьло Бесланын луэм шимучырен герӟаcькемын. «Улон шапык» огъяросси акци Ижкарын интернационал ожгарчиослэн синпелетсы дорын ортчиз. Терроризм сярысь вераны кулэ, — шуо радъясьёс, уката ик егитъёслы. Терроризм — быдэс дуннеын тужгес но бадӟымез кышкытлык. 

2004-тӥ арын  Бесланын 300-лэсь ятыр чик янгыштэм адямиос быризы. Ӝыныез соос пӧлысь али гинэ улонэз шӧмъяны кутскемъёс — нылпиос. Террористъёсын сэрен улонзы уретӥськиз асьме улосчиосмылэн. Тодэ ваёно: Москва 2010-тӥ ар.  Бырыны шедизы Удмуртиысь 2 нылъёс. Берлоез пӧлысь: Санкт-Петербург, 2017-тӥ ар. Быриз Кез ёросысь 50 аресъем нылкышно.Йӧскалык политикая элькун министр Лариса Буранова егитъёслы уката ик сак кариськыны курыса вазиське. Со шуэ: «Интернетын туж трос ӧтёнъёс, ӵектонъёс пӧртэм группаосы пыриськыны. Мон курисько — сак кариське. Ведь историын ӧвӧл сыӵе оскон, кудӥзлы кулэ мукет адямиез быдтыны».Лариса Бурановалэн верамезъя, умой луысал котькуд адями туннэ огъяроссии акци сярысь аслаз мерлыко вотэсбамаз верасал ке, тросгес адями мед тодоз шуыса.«Улон шапык» акци Ижкарын туннэен уг йылпумъяськы. 6-тӥ куарусёнэ Терроризмен нюръяськонын огкылысь луон нунал улсын вир басьтонъя элькун станциын «Сёт вирдэ – уть улонэз» мерлыко акци радъяськоз на.

http://www.myudm.ru/