Иворъёс


Егитъёслы калык эктонъя "Мост" лагерь ужалоз Ижкарын

19.06.2018



22-28-тӥ инвожое Ижкарын Финн-угор нылпиослы но егитъёслы эктонъя «МОСТ» XV калыккуспо лагерь ужалоз. Ӵектос президент грантъёсъя фондлэн вормисез луэ. 

Лагерь смена но финн-угор калыкъёслэн «Воршуд» улосвылкуспо фестивальзы сӥё-дано усьтӥськозы Ижкарысь Киров нимо паркын 23-тӥ инвожое.

Ӵектослэн кивалтӥсезлэн, «Чебеляй» калык эктонъя студилэн кивалтӥсезлэн,  Наталья Чирковалэн верамезъя, ужрадэ 100 –лэсь трос эктӥсь егитъёс пыриськозы. Соос пӧлын : Удмуртиысь «Чебеляй» студиысь егитъёс, Румыниысь «Сазлабу» венгер коллектив, Эстониысь «Каякс» коллектив.

Проектлэн дышетон люкетаз чакламын эктонъя мастер-классъёс, урокъёс, коллективъёслэн кивалтӥсьёссылы практикумъёс, ӵошен эктон дышетон. Егитъёслы но дышетӥсьёслы калык эктонъёсъя визь-кенеш сётозы Удмуртиысь, Эстониысь, Румынись балетмейстеръёс: Рита Мяндла, Эндре и Имола Вирак, Кари Кеттунен.

Со сяна, пиналъёс вуылозы Вотка но Сарапул каръёсы, Пичи Пурга, Балезино, Шаркан, Яр, Глаз ёросъёсы. Татын соос венгер но эстон эктонъёсъя мастер-классъёс ортчытозы.

24-тӥ инвожое Ижкарысь тымет дурын «Мост» но «Воршуд» ӵектосъёслэн валтӥсь ужрадзы – эктонъя бадӟым праздник – орточз.