Иворъёс


10 сюрслэсь трос адями шулдыръяськизы Герберын

16.06.2018



   

16-тӥ инвожое Ува ёросын удмуртъёслэн «Гербер» шулдыръяськонзы ортчиз. Татчы Удмуртилэн вань ёросъёсысьтыз, бускель улосъёсысь но Санкт-Петербургысь делегациос вуизы.

Калыкез ӟечкылазы Удмурт Элькун Кивалтэтлэн Тӧроез Ярослав Семенов, Удмурт Элькунысь Кун Кенешлэн Тӧроез Алексей Прасолов, Удмурт Элькунъя валтӥсь федерал инспектор Дмитрий Мусин, Вань удмуртъёслэн «Удмурт Кенеш» ассоциацизылэн президентэз Татьяна Ишматова.

 «Ӟечбуресь, гажано эшъёс! Сюлмысьтым ӟечкыласько Тӥледыз Гербер шулдыръяськонэн! Ю кизён ӟечкын быдэсмиз. Туннэ асьмеос сӥлы кароме гуртысь музъем ужасьёсты. Соос тодо крестьян ужлэсь дунзэ. Макем ӟеч туннэ шулдыръяськомы, сокем удалтоз кизем ю-няньмы. Ойдолэ тыршоме Гербермес шулдыр но яркыт ортчытыны. Гурт – асьмелэн кужыммы но данъяськонмы. Но туннэ нуналэ солы юрттэт кулэ. Соин ик сюресъёс лэсьтӥськомы, интернет кыскиськомы. Туэ вотэс 200-лэсь ятыр гуртъёсы вуоз. Та азьпалан лэсьтоно ужъёсмы, нош туннэ понна валтӥсь ужмы – шулдыръяськон. Сӥзисько капчи мылкыд, ӟеч шулдыръяськон. Герберен тӥледыз!», – ӟечкылаз калыкез кивалтэтлэн Тӧроез Ярослав Семенов.

Удмурт Элькунысь гурт возёсъя но сиён-юонъя Министерство ю-нянь кизёнлы йылпумъянъёс лэсьтӥз, устоосэ ёросъёсты пусйиз. Тужгес но ӟеч ужазы Алнаш но Вавож ёросъёс, соос бӧрсьы Можга ёрос мынэ, куинетӥ – Вотка ёрос.

Валтӥсь сцена вылысен ик ивортӥзы, 2019-тӥ арын Гербер Эгра ёросын ортчоз шуыса. Эгра ёрослэн Тӧроезлы Александр Чирковлы Ува ёрослэн Тӧроез Владимир Головин Герберлэсь пуссэ, кылдысинэз, сётӥз.

Герберез сӥё-дано усьтэм бере, котьку сямен, ужаны кутскизы пӧртэм площадкаос. Удмурт кибашлыослэн  киужъёсынызы вузкарон-адӟытон радъяськиз «Усточикарын». Нош пӧртэм ёросъёсын улӥсь удмуртъёс асьсэлэн сиён-юонъёсынызы куноятӥзы но сям-йылолъёсынызы тодматӥзы куноятон азбаръёсазы. «Эктон лудын» мылкыд карисьёс удмурт но финн-угор калыкъёсэсь эктонъёссэс дышетӥзы. «Жингрес возьвылын» калыкез шулдыртӥзы элькунысьтымы но мукет улосъёсысь профессиональной но самодеятельной коллективъёс, нимаз кырӟасьёс. Пичи куноос понна ужаз «Шудон азбар». Удмурт воргоронъёс-батыръёс кужымзэс эскеризы «Батыр шудонъёс» площадкаын. «Веник керттонон» азбарын ёросъёслэн тӧрооссы веник керттыны быгатэмзэс возьматӥзы. Тужгес усто веник кертто Дэри, Сьӧлта ёросъёсслэн но Воткакарлэ кузёоссы. Йылпумъяськиз шулдыръяськон егитъёслы «Шундэктон» кырӟан-эктон программаенызы.