Иворъёс


Бесерманъёс Кӧрбанэ люкаськизы

11.06.2018



10-тӥ инвожое Юкаменск ёросысь Ёжгурт котырын бесерманъёслэн «Кӧрбан» шулдыръяськонзы ортчиз.

Куное  Яр, Глаз, Балезино ёросъёсысь куноос вуизы. Калыкез шулдыртӥзы калык коллективъёс. Кузёос, дышем сямъя, ӝук пӧзьтӥзы, шудон-вожвылъяськонъёс дасязы. Воргоронъёс «Бесерман - 2018» ним басьтон понна, возьматӥзы, кызьы кортӵог шукконо, кызьы робо питранэз тупатоно.

Кык финалистъёс армрестлингын кужымзэс мертазы. Вормисе потӥз но "Бесерман — 2018" ним басьтӥз Балезино ёросысь Юнда черкогуртысь Иван Урасинов.

Калыкъёслэн Эшъяськон юртысьтызы ӧнерчиос  ивор вӧлмытӥсьёс понна пресс-тур дасяз. Соос асьсэлы бесерманъёс сярысь материал люказы. Матысь дыре  та калык сярысь теле-программаосты учкыны луозы.