Иворъёс


ГЕРБЕР матэктэ!

06.06.2018



16-тӥ инвожое  Ува ёросысь Пекшур гуртын Гербер шулдыръяськон ортчоз. Куноос понна узыр программа дасямын, котькудӥз ужрад удмурт калыклэн  лулчеберетэныз мургес  тодматоз.  

Гербер  - удмурт калык шулдыръяськон. Элькун праздник луыса 1992-тӥ арысен радъяське. 2015-тӥ арысен арлы быдэ Мускоын но ортчытӥське. Туэ Гербер сӥземын воршудъёслы, тодметпусэз герберсяська луоз. 

Фестивалез усьтоз тодмо артистъёслэн возьматонэнызы тетар шоу но кивалтӥсьёслэн ӟечкыланъёссы. 

Люкаськем калык понна ужалозы пӧртэм площадкаос. «Тӧршор» валтӥсь сцена вылын шулдыръяськонэз сӥё-дано усьтон, музъем ужасьёсты данъян ортчоз.

Бӧрысь та сцена вылын ик интыяськоз мукетыз площадка – «Жингрес возьвыл». Татын быгатонъёсынызы паймытозы элькунысьтымы но мукет улосъёсысь профессиональной но самодеятельной коллективъёс, нимаз кырӟасьёс. 

Нош кыӵе Гербер вӧсям ӝуктэк? Та вашкала йылол «Мудор» плщадкаын ортчоз. 

Удмурт кибашлыослэн  киужъёсынызы вузкарон-адӟытон радъяськоз «Усточикарын».

Удмурт калык сиён-юонэнъёсты веръяны но пӧртэм ёросъёсын но улосъёсын улӥсь удмуртъёслэн сям-йылолъёсынызы тодматскины луоз «Кунокуа» азбарын.

Удмурт но финн-угор эктонъёсты тыпыртозы но быгатӥсьтэмъёсты дышетозы «Эктон лудын» Пичи куноос понна  калык шудонъёс но ӵошатсконъёс радъяськозы «Шудон азбарын».  

Удмурт воргоронъёс-батыръёс кужымзэс эскерозы «Батыр шудонъёс» площадкаын. Таостэк шулдыръяськон бездыт луысал. «Веник керттонон» азбаре кожалэ ёросъёслэсь тӧроссылэсь  веник керттыны быгатэмзэс учкыны. Нош ӝыт «Шундэктон» площадкаын вань куноослы егит но задор мылкыд кузьмалозы егит кырӟасьёс.   

Герберлэн радлыкез:

 09.30-10.30 — куно пумитан;

10.00-16.00 – кибашлыослэн ужъёсынызы адӟытон-вузкарон;

11.00-12.00 – Герберез сӥё-дано усьтон;

11.30-13.00  – ӝук вӧсян;

12:15—15:00  - куно пумитан азбаръёсын нуназеян, «Кырӟан бусы» площадкалэн ужез;

12:15—16:00 — элькунысь но палэнысь улосъёсысь творческой коллективъёслэн номеръёссы  («Жингрес возьвыл»), нылпиослы шудонъёс («Шудон азбар»), спорт вожвылъяськонъёс  но шудонъёс («Батыр шудонъёс»), ёрос Тӧрослэн веник керттонъя вожвылъяськонзы;

16:30 — куно келян;

18:00—22:00 — позыръяськон («Шундэктон»).