Иворъёс


"Вместе" улосвылкуспо сессия йылпумъяськиз

28.05.2018



24-27-тӥ куартолэзе Ижкарын мерлыко огазеяськонъёслэн ёзчиоссы, Калыкъёслэн Эшъяськон юртъёссылэн но йӧскалык центръёслэн ӧнерчиоссы понна улосвылкуспо дышетон сессия ортчиз. Ужрадэ Ямало-Ненецкой но Ханты-Мансийской автономной округъёсысь, Мордовиысь, Комиысь, Удмуртиысь, Свердловск, Киров, Омск, Ульяновск но Москва улосъёсысь 80 азьветлӥсьёс пыриськизы. 

Егитъёс йӧскалык кусыпъёсты радъян, экстремизмен нюръяськон, ӵектосъёсын кивалтон но соосты калык пӧлы вӧлмытон  сярысь лекциос кылзӥзы,  ӵектосъёсты азинлыко быдэстонлы сӥзем мастер-классъёсы, практической занятиосы пыриськизы.

«Та центр – бадӟым дышетон площадка, кытын пӧртэм улосъёсысь егитъёс асьсэлэсь ӵектосъёссэс возьматыны, ог-огенызы быгатонлыкъёсынызы вошъяськыны быгато.Оскисько, ӵапак таӵе ужрадъёс егитъёс пӧлын калык кусыпъёсты радъяны но Россиын улӥсь калыкъёслэсь лулчеберетсэс узырмытыны юртто», – вазиськиз Форуме вуэмъёслы Удмурт Элькунысь йӧскалык политикая министрлэн воштӥсез Людмила Соковикова.

Нырысетӥ нуналаз егитъёсын ужазы Айказ Микаелян, Йӧскалык ужпумъёсъя федерал агентствоысь валтӥсь консультант, но Денис Исмаков, Ужбергатолы дышетонъя йӧскалык ассоциациысь вакчи дыр куспын дышетон программаосъя комитетлэн кивалтӥсез. Соос вераськизы кунмуртлыкез будэтон сярысь, нетворкинлэн туала улонын интыез но азинтӥськемез сярысь.

Кыкетӥ нунал кутскиз «Информационный ресурс в этнопространстве» кенешон площадка бордысен. Вераськонэз нуиз Россия Федерацилэн Президентэз бордысь йӧскалык кусыпъёсъя кенешлэн ёзчиез, Россия Федерациысь Кун Думаысь йӧскалык ужпумъёсъя комитетлэн экспертэз Маргарита Лянге. Пумиськонын  йӧскалык кусыпъёс  темаез югдытон  сярысь пӧртэм юанъёс чузъяськизы. Егитъёсты йӧскалык кылэз но лулчеберетэз утёнлы сӥзем ужрадъёсын тунсыкъяськытон сярысь юанлы Маргарита Лянге вераз: «Ужрадэ кинэ ке кыскон понна, тӥледлы асьтэлы яраны кулэ со, ма  тӥ лэсьтӥськоды. Ужез сюлмысь лэсьтоно. Пӧяськемез егитъёс шӧдо. Мӧзмыт, яратытэк лэсьтэм ужрадъёсы соос уз лыктэ». 

Бӧрысь егитъёс ужазы мерлык удысын ӵектосъёс кылдытон бордын. Мар со сыӵе мерлыко ӵектос, кызьы сое кылдытоно, малы нимысьтыз саклык висъяно, кызьы грант басьтон понна шонер заявка гожтоно – та но мукет юанъёслы валэктон сётӥз Светлана Чапарина, «Культурная мозаика» вожвылъяськонлэн Приволжской федерал округъя улосвыл операторез.

Йылпумъяськиз кыкетӥ нунал «Россиысь калыкъёслэн эктонъёссы» программаен, кудзэ дасяз но нуиз Калыкъёслэн Эшъяськон юртысьтызы режиссер-постановщик Дмитрий Корепанов.

Берпуметӥ нуналэ Удмурт Элькунысь ӟуч лулчеберетъя огазеяськонлэн ёзчиез Максим Фефилов егитъёслы ӵектосъёсты азинлыко быдэстон  вылысь IT-ватсэтъёсты но цифровой технологиосты кутон сярысь вераз. 

Россиысь егитъёслэн огазеяськонзылэн Удмуртиысь езэтэзлэн кивалтӥсез Дмитрий Машин мерлыко огазеяськонъёслэн  мерлыко ужъёссылэн видъёссы но формаоссы сярысь мадиз.  

Калыкъёслэн Эшъяськон юртысьтызы методистъёс Дарья Патрикеева но Ирина Трубицына дискуссионной площадкаослэсь ужзэз радъян  сярысь веразы.

«Календарь единых действий» площадкаын егитъёс Даниил Ходыревен, Удмурт Элькунысь Тӧролэн но Кивалтэтлэн Администрациысьтызы ӧнерчиен, Россиысь кун праздникъёслы сӥзем бадӟым акциос малпазы.

Сессия йылпумъяськиз, выль-тодон валанъёссы, эшъёссы юрттозы  егитъёслы выль пайдалыко ӵетосъёс кылдытыны но соосыз быдэстыны .