Иворъёс


«Информационный ресурс в этнопространстве» кенешон площадка

25.05.2018



25-тӥ куартолэзе Калыкъёслэн Эшъяськон юртазы егитъёслэн трос йӧслыко «Вместе» дышетон центразы «Информационный ресурс в этнопространстве» кенешон площадка ужаз.

Вераськонэз нуиз Россия Федерацилэн Президентэз бордысь йӧскалык кусыпъёсъя кенешлэн ёзчиез, Россия Федерациысь Кун Думаысь йӧскалык ужпумъёсъя комитетлэн экспертэз Маргарита Лянге.

Пумиськонын егитъёс трос юанъёс сётъязы. Тужгес но яркыт пӧрмиз егитъёслэн йӧскалык кылэз но лулчеберетэз утёнлы сӥзем ужрадъёсын тунсыкъяськымтэзы сярысь ужпумез сэрттон-пертчон. Эксперт пусйиз: «Жаляса верано луэ, сыӵе ужрадъёслэн формазы но пуштроссы уг вошъяськы. Соос али ке но ӵемысь Совето Союз вакытэ выллем ик ортчытъясько. Таӵе ужрадъёс тунсыко луо арлыдоослы, нош егитъёслы уг. Али егитъёс ивортодэт пушкын будэмын, соосын одӥг кыл шедьтон понна одӥг «тулкымын» луыны кулэ». Нош мар кароно егитъёсты таӵе ужрадэ кыскон понна?  Та юанлы Маргарита Лянге валэктӥз: «Ужрадэ кинэ ке кыскон понна, тӥледлы асьтэлы яраны кулэ со, ма  тӥ лэсьтӥськоды. Ужез сюлмысь лэсьтоно. Пӧяськемез егитъёс шӧдо. Мӧзмыт, яратытэк лэсьтэм ужрадъёсы соос уз лыктэ».

Мукетыз тунсыко юан герӟаськемын вал этнотуризмен но удмурт лулчеберетлэн «консервациеныз». Егитъёс сюлмсько удмурт эстрадаын выль коллективъёс но кырӟасьёс ӧвӧл, нош фольклор коллективъёс трос шуыса. Маргарита Лянге вараз: «Удмурт калыклэн лулчеберетэз одно ик азинтӥськыны, туала дырлэн куронъёсызлы тупаны кулэ.  Мыным туж кельше этника али модае пыре шуыса. Калык пусъёсыз али ӵем шедьтыны луэ дӥсьёсысь. Со туж яркыт, туала пӧрме».

Маргарита Лянге егитъёслы  удмурт егит кырӟасез но кылбурчиез  Богдан Анфиногеновез примере пуктӥз: « Богдан – туала егит кырӟась, аслаз произведениосаз этникаез кутэ . Со – удмурт крезьгурлэн азьлане вамышез». Озьы ик эксперт пусйиз  калык ансамсбльёсты но утёно шуыса: « Лулчеберет но крезьгур удысын вань течениос кулэ луо: одӥгъёсыз выльзэ кылдыто, мукетъёсыз – вужзэ ышемлэсь утё».