Иворъёс


Кез каргуртын "Пест-фест" фестиваль ортчиз

20.05.2018



Кез каргуртын куинетӥзэ пешник будослы сӥзем "Пест-фест" нимо фестиваль ортчиз. Кез ёросын улӥсьёслэн вазь тулыс потӥсь жуг-жаг будос — пешник — одӥгез йӧскалык тодметсы. Солы нимысьтыз фестиваль но сӥземын. «Пест-фест» фестивальын ёросын улӥсьёс пешниклэсь вань пайдазэ, чеберзэ, аспӧртэмлыксэ возьматыны тыршо. Ылен, пӧзьтыса, пыжыса — котькыӵе амалэн дасямзэ веръяны луиз таяз радэ фестивальын. Татын ик семьяос пӧлын пешниклэсь пельнянь кутонъя вожвылъяськон радъяськиз. Котькудӥз 100 пельнянь кутӥз но учкисьёсты кунояз.«Ми Ижкаре пельняньлы сӥзем фестивале пешникен пельняньмес нуллӥм вал. Отысен ик асьме фестивальмес ортчытон сярысь малпанмы кылдӥз, — шуэ фестивалез радъясь Пётр Тихонов. – Мукет ёросъёсын улӥсьёс сое ведь уг сиё. Милям сое быдэс шаермылы, бӧрысь, оло, быдэс дуннелы но возьматэммы потэ. Та вакыт, куке пешник музъемысь бычыяське, ортчытӥськом ужрадмес».

Арысь аре ужрадэ тросгес калык пыриське. Туэ пешникен тодматскыны вуизы бускель  Дэбес, Яр, Красногорск но Шаркан ёросъёсысь куноос.

Пӧраськем сяна, пешниклы сӥзем кырӟан-веранъёс, такмакъёсты быдэстӥсьёс пӧлын но ӵошатскон радъяськиз. Со сяна туэ нырысьсэ сцена вылын пешниклэсь тужгес но коштан костюмез бырйизы.

Вуоно «пест-фест» фестивале одно ик лымшор палась куноосты ӧтёзы. Уго, отын мар со пешник, кызьы сое сиёно, кыӵе шӧмыз  татчыозь уг тодо.

http://www.myudm.ru/