Иворъёс


Иже вуэ "Стаь первым!" акция

18.05.2018



Нылпиосты утён нуналэ Ижын ортчоз пиналъёслы юрттонъя «Стань первым!» акция. Туэ со 16-тӥзэ радъяське ни. Азьвыл аръёсы акция ортчиз Москваын, Ярославльын, Самараын, Казаньын но мукет городъёсын.

 

 

1-тӥ инвожое Иже лыктозы «Первый канал» телекомпаниысь ведущийёс, со сяна, тодмо кырӟасьёс, артистъёс но спортсменъёс. Нунал ӵоже соос тодматскозы спортэн выронъя, эмъяськонъя юртъёсын, реабилитационной центрен, нылпиослы синпель кузьымъёс сётозы, кинлэсь ке, оло, льӧль малпанъёссэс но быдэстозы.

Но таин шумпотон уз быры. «Первый канал» «О!», «Дом кино» но «Музыка Первого» телеканалъёсын валче Ижлэн пӧртэм сэрегъёсаз ужрадъёс ортчытоз. Кылсярысь, 12.00-16.00 часъёсы зоопарке дунтэк велыны луоз, нош «О!» телеканал вакчияк вералоз пӧйшуръёслэн улонзы сярысь. Циркын нылпиослы дунтэк шоу возьматозы, нош «Россия» кинотеатрын — «Три богатыря и принцесса Египта» мультфильм.

«Дом кино» киноканал «Ералаш» тележурналэз кылдытӥсьёсын пумиськон ортчытоз, луоз ачиз режиссёрез Борис Грачевский, «Металлург» культурая дворецын возьматозы выль сюжетъёсты но.

Киров нимо паркын «Мынам Удмуртие» телерадиокомпани но ужалоз — «Шудон корка» программалэн площадкаез радъяськоз. Со удмурт лулчеберетлэсь узырлыксэ но аспӧртэмлыксэ возьматоз. Площадкалэн ужез пиналъёслы мастер-классъёс бордысен кутскоз, собере Москваысь лыктэмъёсты но куноосты удмурт кырӟан-эктонъёсын будӥсь кизилиос шулдыртозы.

«Милям площадкамылы но бадӟым куноос саклыксэс висъязы ке, оло, милям но номеръёсмы шедёзы Мускоысь бадӟым экранэ. Оло, кыӵе ке тунсыко адями шедьтозы пӧлысьтымы, интервью гожтозы,  озьыен луонлыкмы вань «1-тӥ каналэ» но шедьыны», — серекъяса вера «Шудон корка» плащадкаез дасясь Ольга Фархутдинова.

Нош ӝытазе Шор площадьын луоз концерт, татчы пыриськозы Россиысь тодмо артистъёс. Ужрад йылпумъяськоз яркыт салютэн.

Ивор кутэмын: http://udmddn.ru