Иворъёс


Удмуртиын «Быг-Быг» фестиваль ортчоз

05.07.2018



Финн-угор сиён-юонъя «Быг-Быг» калыккуспо фестиваль Шаркан ёросысь Быгы гуртын туэ витетӥзэ радъяськоз ни. Радъясьёслэн ивортэмзыя, таиз ужрад тужгес яркыт но «ческыт» луоз. Озьы ик таяз арын тужгес трос пыриськисьёс луозы шуыса возьмало. Соос понна трос кузьымъёс дасязы, одӥгез соос пӧлысь — «Быгы салам». Гуртысь лулчеберетъя юрт азьын, кытын фестивальлэн йылпумъян нуналэз ортчоз, вань куноослы тырмымон сиён пӧралозы. Мар со луоз, радъясьёс али уг шараяло. 5–7 пӧсьтолэзе ортчоно фестивальын вашкала рецептъёсъя сиён-юонъёсты веръяны, пӧраны дышетскыны луоз. Быгыын гинэ куноос йӧскалык юонэз — варсез — веръяны быгатозы. «Финн-угор сиён-юонъя «Быг-Быг» фестиваль улсын витетӥзэ ортчоз ни йӧскалык сиён-юонъёсын «Милям ческытгес!» вожвылъяськон. Ужрадлэсь та люкетсэ куноос котьку чидатэк витё, малы ке шуоно, кызьы ачиз калык, озьы ик солэн сиён-юонъёсыз аспӧртэмесь но тунскыоесь."Кулинаръёс котькуд ар выль но ческыт рецептъёсты ваё. Ми пӧрасьёсты фестивалямы ӧтиськомы но асьсэ калыксылэсь тужгес ческыт сиёнзэ пӧраны ӵектӥськомы", — шуэ Жанна Ермолаева, Удмурт лулчеберетъя «Быгы» центрлэн кивалтӥсез. Пӧртэм аръёсы фестивале Марий Элысь, Карелиысь, Пермь шаерысь, Татарстанысь, Киров улосвылысь, озьы ик Эстониысь, Венгриысь, Финляндиысь, Франциысь пӧрасьёс вуылӥзы ни. Туэ но куноос коми-пермякъёслэсь посикунчиксэс, бесерманъёслэсь саламатсэс, мадьяръёслэсь токаньзэс, поръёслэсь подкогыльёзэс, эстонъёслэсь сыръёссэс веръяны быгатозы.Фестивале пыриськисьёсты гуртоос ас доразы интыялозы — соос 90 муртэ пыртыны быгато. Со сяна, 100 пала адямилы Шарканысь кунокуаосы интыяськыны луонлык вань.Пӧраськон ужрадъёс сяна, фестивальын творчествоя лабораториос, тодосъя кенешонъёс, крезьгуро шулдыръяськонъёс ортчозы. Кылсярысь, туэ нырысьсэ фестиваль улсын туала крезьгуръя фестиваль-конкурс ортчоз.

Финн-угор сиён-юонъя «Быг-Быг» калыккуспо фестиваль «Быгы — финн-угор дуннелэн лулчеберетъя карез» программа улсын 2014-тӥ арын вордскиз. Финн-угор калыкъёслэсь лулчеберетъя дунлыксэс пӧран, кырӟан, эктон но крезьгуро инструментъёсын шудон искусство пыр возьматон вылысь ужрад котькуд ар радъяське.