Иворъёс


Александр Бречалов удмурт азьветлӥсьёсын пумиськылӥз

18.04.2018



18-тӥ южтолэзе Удмурт Элькунлэн Тӧроез Александр Бречалов К. Герд нимо гимназиын удмурт азьветлӥсьёсын  пумиськылӥз.

Нырысь ик Удмуртилэн Тӧроез гимназиен тодматскиз, дышетскисьёсын вераськиз. Собере Александр Владимирович «Удмурт кенеш» огазеяськонлэн азьветлӥсьёсыныз пумиськиз. Нырысь ик Удмурт лулчеберетъя центр сярысь юан ӝутэмын вал. Кызьы тодмо ини, та центр интыяськыны кулэ вал В.Г. Короленко нимо театрлэн юртаз. Эскеронъёс ортычытэм бере, ӧнерчиос йылпумъян лэсьтӥзы: куашкам юртэз  тупатон выль юрт пуктонлэсь но дуно усёз. Соин ик выль юрт пуктон сярысь огкылэ вуэмын. Центрез Удмуртилэн кунлык басьтэм дырысеныз 100 ар тырмонэзлы усьтыны чакламын бере, уж борды кутсконо ӝегатскытэк.

Кызьпу арамаез выльдон сярысь но юан сётэмын вал. «Калык  юалляськонлэн йылпумъянъёсызъя, Кызьпу арама куатетӥ инты басьтӥз. Та лыдпус уг вера асьмеос та юанэз палэнэ кельтомы шуыса. Но карын улӥсьёслэн малпамзыя, шоркарын вань интыос, кудъёсызлы  нырысь-валысь саклык висъяно», - пусйиз Александр Бречалов.

Туж бугырес вераськонъёс мынӥзы удмурт вещание пумысен. Ассоциацилэн ёзчиосыз ӝожтӥськизы удмурт кылылын передачаос кулэсмо шуыса. Александр Владимирович «Удмурт Кенеш» огазеяськонлэн азьветлӥсьёсызлы, «Мынам Удмуртие» телеканаллэн кивалтӥсьёсызлы но Удмуртилэн Тӧроезлэн юрттӥсьёсызлы та юанъя нимысьтыз пумиськон ортчытыны ӵектӥз. 

Пумиськонэз йылпумъяса, Александр Владимирович осконзэ вераз, азьланяз но элькунысь йӧскалык кусыпъёсты  юнматон бордын ӵошен, дӥсьтыса ужаны.