Иворъёс


Бесерманъёслы сӥзем конференция радъяськоз Глазкарын

16.04.2018



20-21-тӥ оштолэзе Глазкарын «Бесерман калыклэн кылыз, историез, лулчеберетэз: эскеронъёслэн инэтсы но азинлыксы»  Огъяросси конференци радъяськоз.

Та конференци   бесерманъёслэсь кылзэс, историзэс но лулчеберетсэс эскеронъёслы  сӥзем нырысетӥез нимысьтыз ужрад луэ.  Конференци нырысьсэ огазеялоз пӧртэм тодосчиосты: Россиысь но кунгож сьӧрысь валтӥсь университетъёсысь но тодос центръёсысь кылчиосты, этнографъёсты, историкъёсты, литературоведъёсты, биологъёсты, музыковедъёсты, музейын ужасьёсты.

Конференциын эскеронъёслы йылпумъянъёс лэсьтозы, туала куронъёсты лыдэ басьтыса, калыкез эскеронын выль оръёс сярысь кенешозы. Лингвистической экспедицие пыриськем кылчиос   бесерман  кыллэн нырысетӥ кыллюкаменыз тодоматозы. Этнографъёс вералозы калыклэн лулчеберетэз но сям-йылолъёсыз сярысь. Бесерман крезьёсты гожтон но соосты эскеронъёс сярысь мадёзы музыковедъёс. Историкъёс вашкала документъёслы валэктонъёс сётозы. Та тунсыко калыкез эскерон понна, тодосчиос нимысьтыз экеспедициосы потаны кутскизы XIX даурлэн шораз ини, туннэ нуналэ но эскерон экспедициос ӵем вуыло бесерман гуртъёсы. 

Ужрад ортчоз В.Г.Короленко нимо Глазкарысь педагогикая кун институтын, 1-тӥ дышетскон юртын (Удмурт Элькун, Глазкар к., Первомайской ур., 25-тӥ юрт). Кутсконэз 10.30 часэ.

Ватсаса ивортодэт басьтыны луэ: Майорова Марина Владимировна, Короленко нимо ГГПИ-лэн пресс-службаезлэн кивалтӥсез, 8-912- 850- 14- 14, e-mail: Mayorova1969@yandex.ru;

Попова Елена Васильевна, оргкомитет (УИИЯЛ УдмФИЦ УрО РАН) тел. моб.:  8-912-754-63-49,  e-mail: elvpopova@yandex.ru