Иворъёс


Ужзэ мытӥз «Мир в диалоге» форум

12.04.2018



12-тӥ оштолэзе Калыкъёслэн Эшъяськон юртазы муниципал кылдытэтъёслэн «Мир в диалоге» форумзы ортчиз. Ужрадлэн валтӥсь меретэз – интыысь кивалтэтъёсын кун йӧскалык политикаез быдэстонъя огъя сӧзнэт кылдытон.  

Форуме вуизы Удмурт Элькунысь но Приволжской федерал округысь муниципал кылдытэтъёсысь кивалтӥсьёс но йӧскалык политика понна кылкутӥсь ӧнерчиос. Форуме Удмуртилэн каръёсысьтыз но ёросъёсысьтыз, Татарстанысь, Башкортостанысь, Ульяновкс но Киров улосъёсысь огъя 200-лэсь ятыр адями пыриськиз.

Удмурт Элькунысь йӧскалык политикая министр Л.Н. Буранова Форумлэн пленарной заседания вераз: «Берло аръёсы кунпуш йӧскалык политика шӧдскымон воштӥськиз, туннэ йӧскалык юанъёсты уг луы ни палэнэ кельтыны. Улосъёсын йӧскалык  политкаез быдэсто кун но интыысь тӧрлык ёзэсъёс, мерлыко огазеяськонъёс, осконэн герӟаськем огазеяськонъёс. Ми тыршимы форумез котькуддылы пайдалыко карыны. Котькуд площадкаын возьматэмын но эскеремын луозы йӧскалык политика удысысь азинлыко ӵектосъёс, кудъёссэ быдэстыны луоз муниципал кылдытэтъёсын». 

Россиысь калыкъёслэн ассамблеязылэн тӧроез С.К. Смирнова ёросъёсын ужась ӧнерчиослэн быгатонлыкъёссэс будэтон сярысь мадиз: «Оскеме потэ, Удмурт Элькун луоз одӥгез улос, кудаз пыртэмын луоз «йӧскалык  но пӧртэм инмаръёслы оскон кусыпъёсъя ӧнерчи» ӧнерлык стандарт».

«Объединение и социальная поддержка женщин-мигрантов» мерлыко огазеяськонлэн тӧроез,  «Подольск Московской области» кар округлэн мерлыко палатаезлэн ёзчиез Ефросинья Гыштемулте ивортӥз: «Кӧчем калыкен гинэ ӧвӧл, улосысь выжы калыкъёсын но ужаны кулэ. Интренациональной визьнодан сямез вунэтыны но ыштыны уг яра. Асьмен кунамы азинлыко ужан понна валаны кулэ , кызьы астэ возёно трос йӧслыко улосын».

Калык кусыпъёсъя журналистикалэн гильдиезлэн тӧроез Маргарита Лянге пусйиз, берло дыръёсы йӧскалык политка удысын ивортодэт простанство тырмемын шурдыт но кышкыт иворъёсын, соин ик  татын тыршоно ӟеч иворъёсты возьматыны.

Йылпумъяськиз форум котырес ӝӧкен, кудаз эскеризы люкам материалъёсты, кенешизы эрикрадо актъёсы воштонъёс пыртон сярысь .