Удмуртъёс

Удмуртъёс – Удмурт Элькунысь пыр-выжы калык, финн-угор калыкъёс пӧлысь одӥгез бадӟым лыдо калык (лыдзыя мадьяръёс, финъёс, эстонъёс но мордваос бере витетӥ интыын сыло). 2002-тӥ арын ортчем  лыдъян-чотанъя Россия Федерациын уло 637 сюрс удмуртъёс (странаысь калыклэн 0,44%). Соос пӧлысь 297 сюрсэз (46,6%) улэ каръёсын.

Волга шур кузяна улӥсь мукет финн-угор калыкъёсын ӵошатыса (эрзя но мокша мордва калык, гурезьын но возь выл нёжалын улӥсь мари-поръёс), удмуртъёс уйпалъёслы но лымшоръёслы люкисько ке но, ог-огзылэсь сокем уг висъясько, ваньзы асьсэды удмурт шуо. 2002-тӥ арын ортчем  лыдъян-чотанъя, тросэз удмуртъёс – 460 584 адями (72,3%) – Удмурт Элькунын уло. 110 сюрс удмуртъёс уло вӧзысь улосвылъёсын: Татарстанын – 24,2 сюрс адями, Башкортостанын – 22,6 сюрс,  Марий-Элын – 2,2 сюрс, Перм улосын – 26,3 сюрс, Киров улосын – 18 сюрс, Свердловск улосын – 17,9 сюрс.

Удмуртъёслэсь лыдзылэсь вошъяськемзэ эскерыны луэ орчытэм ревизиослэн но лыдъян-чотанъёслэн материалъёссыя. 1719-тӥ арын ортчиз нырысетӥ ревизия, соку пусъемын вал 48,1 сюрс удмуртъё, нош 1795-тӥ арын (V ревизия) – 135 сюрс. 1858-тӥ арын X ревизилэн лыдъямезъя, 251 сюрс удмуртъёс вал. Быдэс Россиын 1897-тӥ арын вань калыкез нырысетӥ лыдъям пусйиз 421 сюрс удмуртъёсты,  1926-тӥ арын – 504, 2 сюрс удмуртъёсты. Та аръёсы лыдзылэсь кулэсмемзэ валэкны луэ граждан ожен но сютэм (1921) арен. 1959-тӥ арын СССР-ысь удмуртъёслэн лыдзы 624, 8 сюрсозь вуиз, 1970-тӥ арын – 704,3 сюрсозь, 1979-тӥ арын – 714 сюрсозь, 1989-тӥ арын – 746, 8 сюрсозь.

СССР-ын пӧртэм лэсьтӥськонъёсын сэрен, тросэз удмуртъёс вордсекем шаерысьтызы мукет улосъёсы кошкылӥзы. 1926-тӥ арын 89,1%-эз удмуртъёс улӥзы ке Удмурт автономной областьын, 1859-тӥ арлы лыдзы кулэсмиз 76,2%-озь, 1979-тӥ арын – 67,2%-озь , 1989-тӥ арын – 66,4%-озь. Таин ӵош ик удмуртъёслэн лыдзы кулэсме Удмуртиын улӥсь калыкъёс пӧлын но: 1939-тӥ арын  соос вал – 35,6%-эз, 1979 –тӥ арын – 32,1%-эз, 1989-тӥ арын – 30,9%-эз, 2002-тӥ арын – 29,3%-эз гинэ. Тае валэктыны луэ кыкласянь: Удмуртие мукет улосъёсысь калыкъёс лыктэмен но удмуртъёслэн бускель улосъёсы кошкеменызы. Нош палэнын соос асьсэлэсь удмуртлыксэс ышто.

Берло ӝыны даурез ке басьтоно, удмуртъёслэн каръёсын лыдзы будыны кутскиз. 1939-тӥ арын 7,5% удмуртъёс карын улӥзы, 1959-тӥ арын – 18,5%, 1970-тӥ арын – 28%, 1979-тӥ арын – 37,7%, 1989-тӥ арын – 44,7%, 2002-тӥ арын – 44,3%. Элькунысь каръёсын удмуртъёслэн лыдзы пӧртэм – 3,7%-ысен 33,5%-озь.:

Сарапул карын – 3,7% удмуртъёс (3,8 сюрс адями);

Воткакарын – 9,8% (9,8 сюрс адями);

Ижкарын – 16% (101,4 сюрс адями);

Можгакарын – 26,4% (12,5 сюрс адями)

Глазкарын – 33,5% (33,8 сюрс адями).

Гуртэз ке басьтоно, 2002-тӥ арын ортчем лыдъянъя, 53,9%  удмуртъёс уло гуртъёсын.

Мугорвылтуссэс ке басьтоно, удмуртъёс пыро бадӟым европеидной расалэн урал ваезлэн ватка-вам сублапоидной типаз. Та типын сураськемын но огъяськемын европеидной но монголоидной расаослы тупась тодметъёс. Тросэз удмуртъёс шоро-куспо мугоро, йырсизы югыт суд, синъёссы чагыр яке пурысь, ымнырзы кӧня ке паньгес, паськыт бамлыосын.Кемалась пусъемын ини, удмуртъёс пӧлын трос горд йырсиё адямиос шуыса. Та тодметсыя соос шаерамы гинэ ӧвӧл, быдэс дуннеын но (ирландецъёсын ӵош) нырысетӥ инты басьто.

Удмурт кыл, ӟуч кылэн ӵош, Удмурт Элькунлэн кун кылыз луэ. Удмурт кыл финн-угор семьяысь (урал кыл семья) перм кылъёс пӧлы пыре. Грамматиказэ но лексиказэ лыдэ басьтыса, со матын коми кыллы. Куд-ог тодосчиослэн малпамзыя, та кылъёс ог-огзылы матын, ӟуч кыллэн поляк кыллы матын лэмез кадь ик. Удмурт гожпуслык кылдытонлы инъет луизы ӟуч  пусъёс. Берлогес татчы, удмурт кылысь аспӧртэмлыко куараосты возьматон вылысь, пыртӥзы  ӥӧӟӝӵ букваосты.

1775-тӥ арын нырысетӥ грамматика потӥз. Удмурт кыл люкиське  куинь кыллы: уйпал, лымшор, бесерман, нимаз висъяло на шор вераськет. Пӧртэмлыксы соос вискын туж ик бадӟым ӧвӧл, соин ик та диалектъёсын вераськисьёс ог-огзэс валало. Литературной кыл XIX даурлэн пумаз XX даурлэн кутсконаз кылдыны кутске.

Тросэз удмуртъёс православноесь луо (нырысетӥ чукиньдыронъёс ортчиз XVI даурын ик, нош тросэ удмуртъёс православиез кутӥзы XVIII даурын). Куд-ог удмуртъёс вашкала осконэнызы уло, нош куд-огез вашалазэ но уг кушто православиез но возё.

Удмурт  аснимлэн кылдэмез пумозяз эскеремын ӧвӧл на. Та кылпуштросын умой адӟиське индоиран кылысь асэстэм кылдӥнь: мурт, морт – «адями, воргорон» шуэмез возьматэ. Нырысетӥ уд люкетсэ тодосчиос пӧртэм сямен валэкто. Одӥгъёсызлэн малпамзыя, уд пӧрмем одо  пор кылысь: «вож удъёс, вож пушъетъёс» шуэмез возьматэ со. Та кылэз, пе, Ватка шур кузяна возьёсын улӥсь удмуртъёс поръёслэсь асэстӥллям. Мукетъёсыз та аснимез герӟало Ватка шурлэн нимыныз: ватмурт – «Ватка дорын улӥсь адями». Берло ини та кылын ортчизы воштӥськонъёс: отмурт – удмурт-удмурт. Печатлам ужъёсын удмуртъёс таӵе нимъёсын но тодмостэмын: аръёс, ар, ар калык (ар – араб кылысь: адями, воргорон» шуэмез возьматэ), чудь отяцкой, отяк, вотяк (та нимын но Ватка шурлэн нимыз кылӥське: вот кылдӥнь борды итӥське –як кылпӧрмытӥсь итэт (ӵошатэ: сибир-як, перм-як). Бускель калыкъёс удмуртъёсты пӧртэм сямен нималлязы: бигеръёс – арлар, поръёс – одомарий. Удмурт асним гожтосъёсын но книгаосын XVIII даурын ик (1770-тӥ арын Н.П. Рычков гожъяз) пыртэмын ке но вал, соин артэ кема дыр ӵоже кутӥськиз ултӥясь пуштросэн вотяк ним но. 1932-тӥ арын Вотской автономной областез Удмурт шуыса нимазы, озьы удмуртъёслэн аснимзы юнматэмын вал.

Удмурт этнослэн выжыосыз кыстӥсько ананьино вакытэ (асьме эралэсь азь-ло VIII—III дауръёсы). Та дыре со вал финн-перм огъялык. Ананьино выжыос кусып возизы асьсэлэн матысь но кыдёкысь бускельёсынызы. Со сярысь верало археологъёсын шедьтэм азвесьлэсь лэсьтэм чеберъяськон арбериос, пӧлазы вань Средней Азиысь, Кавказысь ваемъёсыз но. Перм калык понна матысь но пайдалыко луизы скиф но сармат калыкъёсын кусыпъёс. Сое возьмато пӧртэм удысъёсысь асэстэм кылъёс: пудо-живот возён но ю-нянь будэтон (пудо, ю), дуно кортъёслэсь арбериос лэсьтон (зарни, корт, дурыны), сиён-юон (нянь, сур). Та кусыпъёс палдурес ӧй вал: перм кылысь индо-иран семьяе пырись осетин кылэ пы-ремын азвесез но пинал лысо нюлэсэз нимась кылъёс.

Индо-иран племяосын кусып воземеныз сэрен, перм калыклэн  улоназ бадӟым инты басьтыны кутско но азьпал радэ пото пудо возён, музъем ужан, чорыган но пӧйшуран. Вашкалаос со вакытэ ик ини туала пудо-животлэсь выжызэ уськытыны быгатӥллям.

Асьме эралэн нырысетӥ сюрсарезлэн кыкетӥ ӝыныяз пьянобор культура вашкала удмурт кыл огъялыклы инъет луэ. Та культураез азинтӥсь калык улӥз Ватка шурлэн шор вадесаз но уллапалаз. Со сярысь верало удмурт топонимъёс, этнонимъёс, легендаос но преданиос.

Вашкала удмурт кыл огъялыклэн тужгес вашкалаез луэ Чупчи культура (IX—XV). Солэн историез кыстӥське удмуртъёслэн нимзы печатлам ужъёсы потытозь.

Пӧртэм гожтосъёсын удмурт калыклэн нимыз бер потӥз. «Повесть вре-менных лет» книгаын со дырлы тодмо луись трос калыкъёс сярысь верамын, удмуртъёс сярысь пал кыл но поттылэмын ӧвӧл. Историез гожъясьёслы ӧз кылды, вылды, удмуртъёсын асэнызы пумиськыны, яке соосты, мукет финн-перм калыкъёсын ӵош, перм калыкъёс шуыса гинэ нимазы. Удмуртъёслэн этнонимъёссы пусъемын XII дауре потэм арабъёслэн гожтэмъёсазы (Абу-Хамид-аль-Гарнати, 1136 ар).

Ӟуч летописьёсын удмуртъёс сярысь нырысьсэ гожтэмын вал 1379 арын, отын верамын ватка ожгарчиослэн (вятская рать) Ар музъем вылэ ветлэмзы ся-рысь. Та дырысен удмуртъёс сярысь гожъямъёс ӵемгес пумисько ини.

Удмуртъёс кык бадӟым группалы люкисько: уйпал удмуртъёс но лымшор удмуртъёс.

Уйпал удмуртъёс вашкала дырысен ик ӟучъёс пала кыстӥськизы но вазенгес ик пыризы пӧртэм улосъёсысь лыктэм ӟучъёсын кылдытэм Ватка огъялыке. XIII дауре ӟучъёслэн лыдзы уката но йылӥз: монголо-татаръёслэсь пегӟыса, татчы вуизы Владимиро-Суздальской, Нижегородской музъемъёсысь ӟучъёс. Ватка кузяна вӧлмытэсь музъемъёсын улӥсьёсыз туж ик трос ӧй вал, соин но, дыр, удмуртъёс но лыктэм калык ваче ӧз вуылэ. Ӟучъёс йылэмен-вуэмен, удмуртъёс Чупчи но Кильмезь шуръёс кузя шунды ӝужан пала кошконо луизы.

Пумен Ватка музъем нижегородско-суздальской князьёслэн асъетсы луэ, татысь кузёос, Москвалэсь нимазъяськыса улэмзы потэмен, ӟуч эксэйлы пу-митъясько ке но, 1489 арын та дуннеез отын улӥсь ӟучъёсын но удмуртъёсын ӵош , ожмаса Быдӟым Москва княжествое пырто.

Лымшор удмуртъёс нырысь ик Волжско-Камской Булгарилэн зӥбет улаз сюризы (уйпал удмуртъёс но булгаръёслы выт тыроно луизы, та палась Булгарие вуэ вал дуно куосын вытлэн тужгес но умой но бадӟым люкетэз), берлогес татын кузё луизы Зарни Орда но Кузон ханство (1552 арозь), собере — Ӟуч кун. Кузон ханстволэн Ӟуч кунэ пыремез сярысь гожтэмын Никоновской летописьын: «…И прислали к государю Арьские люди челом Казаков Шемая да Кубиша з грамотою, чтобы государь их черных людей пожаловал…». Жаляса верано луэ, лымшор уд-муртъёс сярысь вазен гожъямъёс та дырозь рос-прос эскеремын ӧвӧл на. Тужгес но сэрттэм-пертчемез кулэ каро ар удмуртъёс.

Удмуртъёслэн Ӟуч кунэ пыремзы 1558 арын йылпумъяськиз шуыса малпало. Но та историын пӧртэм шугсекытъёсыз вал на. Удмуртъёслэн Ӟуч кунэ пыремзы, огъя учкыса, умойлы вал: воштӥськиз экономика улон, вань удмуртъёслы огазеяськыны луонлык кылдӥз, ужан тӥрлык лэсьтонын но ю-нянь но бакча сиён будэтонын выль тодон-валан вӧлмиз, дышетскыны сюрес усьтӥськиз. Но умоеныз ӵош трос уродэз но вал. Удмуртъёс, мукет ӟуч луисьтэм ӧжыт лыдъем калыкъёсын ӵош, асьсэ вылын пӧртэм ултӥянъёсты шӧдӥзы: соосты кужмысь черке пыртӥзы, ӟучлы берыктӥзы. Секытэсь экономической но мерлыко воштӥськонъёс калык культуралэсь азинсконзэ трослы могӟытӥзы.

Удмуртъёслэн ваньмаз сямен улон удысъёсазы бадӟым воштӥськонъёс ваиз Октябрь революция. Удмурт калыклэн кунлыкез кылдӥз, кудӥзлы кутскон сётӥз 1918-тӥ арын ортчем Вань удмуртъёслэн I съездзы. Тросэз делегатъёс куаразэс сётӥзы РСФСР-ы удмуртъёс понна нимысьтыз улос кылдытон понна, со огазеяны кулэ вал Ватка, Кузон, Уфа но Перм губерниосын улӥсь удмуртъёсты. Та арын ик йӧскалык ужъёсын вырись Наркомын кылдытэмын вал удмурт ёзэт, лэсьтэмын вал Удмурт автономной трудовой коммуналэн Кункатэзлэн но улосвылэзлэн проектъёсыз. Жаляса верано луэ, та ӵектонэз улонэ пыӵатыны люкетӥз Граждан ож. 1920-тӥ арын 4-тӥ шуркынмонэ гожтэмын вал Удмурт автономи кылдытон сярысь Декрет. 1932-тӥ арын Удмурт автономной область  ним кутэмын вал, нош 1934-тӥ арын область автономной республика луиз.

Совето вакытэ удмуртъёслэн ӧнерлыко (профессиональной) искусствозы азинскыны кутскиз. Усьтэмын вал удмурт йӧскалык театр, гожтэмын вал операос, балетъёс, симфониос. Элькунамы гинэ ӧвӧл быдэс дуннеын тодо но гажало эктонъя но кырӟанъя «Италмас» кун ансамблез, фольклор эктонъя «Айкай» театрез но мукетъёссэ. Быдэс Союзэ тодмо луизы Кузебай Гердэлэн, Ашальчи Окилэн, М. Петровлэн, Г. Красильниковлэн, Ф. Васильевлэн, Г. Корепанов-Камскийлэн, С. Виноградовлэн, П. Ёлкинлэн, М. Гариповлэн ужъёссы.

Та вакытэ удмурт калык, солэн лулчеберетэз эшшо но ӝоггес азинтӥськыны быгатысал, дыр, ӧй ке луысалзы политической могӟетъёс. Удмурт кыллэн кутӥськон удысэз меӵак сюбегаз, йӧслыко школаос быризы, удмуртъёс асьсэды удмуртэн шӧдэмысь дугдӥзы, выжыоссэс вунэтыны кутскизы.

20-тӥ куарусёнын 1990-тӥ арын Удмурт АССР-лэн Вылӥ Судэз «Удмурт Элькунлэн кун суверенитетэз сярысь» Деклорация кутӥз. Та арын ик коньывуон толэзьысен шаермы Удмурт Элькун нимаськыны кутскиз.

Берло дуръёсы, перестройкаен, демократиен сэрен, мерлыкын шӧдӥськыны кутскизы удмурт калыклэн сайкамез, азинтӥськыны мылкыд каремез. 1995-тӥ арын Удмурт Элькунлэн Кункатаз удмурт кыл, ӟуч кылэн ӵош,  кун кыл луыса кутэмын вал.  Нош 2001-тӥ арын «Удмурт Элькунлэн кун кылъёсыз  но Удмурт Элькунын улӥсь мукет калыкъёслэн кылъёссы сярысь» Кат кутэмын вал.

1980-тӥ аръслэн пумаз удмуртъёслэн йӧслыко ӧрзы кылдӥз, кудӥз герӟаськемын вал калыклэн асваланэзлэн будэменыз, сртанаын политика удысын воштӥськонъёсын, финн-угор кусыпъёслэн азинтӥськеменызы. 1988-тӥ арын кылдытэмын вал «Удмурт лулчеберетъя клуб», кудӥз бӧрысь  «Дэмен» (1989) огазеяськонлэн инъетэз луиз.  1991 –тӥ арын кылдытэмын вань удмуртъёслэн «Удмурт кенеш» огазеяськонзы, 1992-тӥ арын удмурт егитъёслэн «Шунды» мер огазеяськонзы.

2010-2011-тӥ аръёсы удмурт кылэз дышето 285 огъядышетскон ужъюртъёсын (соос пӧлысь 23 каръёсы) но 297 школазь дышетон ужъюртъёсын (соос пӧлысь 39 каръёсын).  Удмурт кылын потто таӵе газет-журналъёс: «Удмурт  дунне», «Ӟечбур», «Инвожо», «Кизили» (ныли садэ ветлӥсь пиналъёслы но покчиёзо классъёсын дышетскисьёслы журнал), «Кенеш» (литературной общественно-политической журнал) но «Вордсем кыл» (научно-методической журнал).