Ӝожтӥськон ужкагазлэн радлыкез

Огшоры адямиослэсь но юридик муртъёслэсь эрикрадзэс но эриксэс тӥяян учыре, соос  катъя ӝожтӥськон гожтыны быгато. Вазиськыны луэ соку ик огшоры судэ, яке арбитражной судэ, яке таможнялэн ёзэсаз. Луонлык сётӥське ӝожтӥськонэз мылкыд карем интые сётыны.

РФ-ысь Кункатлэн 46-тӥ статьяысьтыз 1-тӥ люкетэзъя, котькуд адями быгатэ аслэсьтыз эрикрадзэ но эриксэ судын утьыны. РФ-ысь Кункатлэн 46-тӥ статьяысьтыз 2-тӥ люкетаз юнматэмын: кун ёзэсъёслэн, интыын аскивалтон ёзэсъёслэн, мер огазеяськонъёслэн но должностной муртъёслэн решениоссы но лэсьтэмзы понна (яке номыр но карымтэзы понна) судэ ӝожтӥськонэн вазиськыны луэ. Эрикрадо кунлэн одӥгез валтӥсез принципез сыӵе: кун ёзэсъёс муртлэсь эрикрадъёссэ тӥяло ке, адями аслэсьтыз эрикрадъёссэ утён пумысен соку ик быгатэ судэ вазиськыны.

РФ-ысь Граждан Кодекслэн 12 но 13-тӥ статьяосызъя огшоры адямиослэсь яке юридик муртъёслэсь граждан эрикрадзэс утьыку, суд умойтэмен лыдъяны быгатэ кун но интыын аскивалтон ёзэсъёслэсь кутэм нормативной луисьтэм актъёссэс, нош куд-ог дыръя, со катъёсын чакламын ке, нормативной актъёссэс но, соос кунмуртлэсь но юридик муртлэсь эрикрадъёссэс но тунсыкъяськонъёссэс уг ке утё.

РФ-ысь «Кунмуртъёслэсь эрикрадъёссэс но эриксэс решениосын но лэсьтэмъёсын (яке номыр карымтэен) тӥяку, судэ ӝожтӥськонэн вазиськон сярысь» 4866-I номеро Федерал катлэн (кутэмын 1993-тӥ арын 27-тӥ оштолэзе) 1-тӥ статьяяз озьы ик юнматэмын: котькуд кунмуртлэн эрикрадэз вань судэ ӝожтӥськонэн вазиськыны, куке кун но интыын аскивалтон ёзэсъёс асьсэлэн умойтэм решениосынызы но ужъёсынызы солэсь эрикрадзэ но эриксэ тӥяло.